Исповедайтеся Господеви, яко благ, яко в век милость eго. Да рекут избавленнии Господем, ихже избави из руки врага, и от стран собра их, от восток и запад, и севера и моря; заблудиша в пустыни безводней, пути града обителнаго не обретоша; алчуще и жаждуще, душа их в них изчезе. И воззваша ко Господу, внегда скорбети им, и от нужд их избави я; и настави я на путь прав, внити во град обителный. Да исповедят Господеви милости eго и чудеса eго сыновом человечeским; яко насытил eсть душу тщу, и душу алчущу исполни благ; седящыя во тме и сени смертней, окованныя нищетою и железом, яко преогорчиша словеса Божия, и совет вышняго раздражиша. И смирися в трудех сердце их, и изнемогоша, и не бе помагаяй. И воззваша ко Господу, внегда скорбети им, и от нужд их спасе я; и изведе я из тмы и сени смертныя, и узы их растерза. Да исповедят Господеви милости eго и чудеса eго сыновом человечeским; яко сокруши врата медная, и верeи железныя сломи. Восприят я от пути беззакония их; беззаконий бо ради своих смиришася. Всякаго брашна возгнушася душа их, и приближишася до врат смертных. И воззваша ко Господу, внегда скорбети им, и от нужд их спасе я; посла слово свое, и изцели я, и избави я от растлений их. Да исповедят Господеви милости eго и чудеса eго сыновом человечeским; и да пожрут eму жертву хвалы и да возвестят дела eго в радости. Сходящии в море в кораблех, творящии делания в водах многих, тии видеша дела Господня и чудеса eго во глубине. Рече, и ста дух бурен, и вознесошася волны eго; восходят до небес и низходят до бездн; душа их в злых таяше; смятошася, подвигошася яко пияный, и вся мудрость их поглощена бысть. И воззваша ко Господу, внегда скорбети им, и от нужд их изведе я; и повеле бури, и ста в тишину, и умолкоша волны eго. И возвеселишася, яко умолкоша, и настави я в пристанище хотения своего. Да исповедят Господеви милости eго и чудеса eго сыновом человечeским; да вознесут eго в церкви людстей, и на седалищи старeц восхвалят eго. Положил eсть реки в пустыню и исходиша водная в жажду, землю плодоносную в сланость, от злобы живущих на ней. Положил eсть пустыню во eзера водная и землю безводную во исходища водная. И насели тамо алчущыя, и составиша грады обитeлны; и насеяша села, и насадиша винограды, и сотвориша плод житен. И благослови я, и умножишася зело; и скоты их не умали. И умалишася и озлобишася от скорби зол и болезни; излияся уничижение на князи их, и заблуждати сотвори я по непроходней, а не по пути. И поможе убогу от нищеты и положи яко oвцы oтечeствия. Узрят правии и возвеселятся, и всякое беззаконие заградит уста своя. Кто премудр и сохранит сия? и уразумеют милости Господни.